Vēļ jaunnedeļ par sasnāgumim i padareitū latgalīšu kulturā 2015. godā var dasaceit pretendentus Latgalīšu kulturys goda bolvai „Boņuks 2015”. Bolvu sajiemieji tiks nūskaidruoti svineigā ceremonejā 2016. goda 28. februārī, izruodūt izvadumu „Saule. Bērni. Rainis” ar varganistis Ivetys Apkalnys pīsadaleišonu i tuos ūtrajā daļā, pasnādzūt bolvys laureatim, ceremonejis vadeituoja Kristapa Rasima uzraudzeibā.
Aizpiļdeitys dasacejuma anketys bolvai „Boņuks 2015” elektroniskā formatā, pa postu voi aizpiļdeitys tīšsaistis dasacejuma veidā Latgolys viestnīceiba GORS gaideis da 2016. goda 11. janvara, bet, kab nabyutu tai, ka kaids pretendents teik palaists garum, cikom teik apkūpuoti sajimtī dasacejumi, organizatori pīļaun anketu īsnēgšonu da 15. janvara. Iz itū breidi sajimtys jau vaira nikai 100 anketu. Dasacejumus izvērtēs žureja, kurys vydā byus kai pārnejuo goda bolvys sajiemieji, tai pīaicynuotī sovu sferu (sabīdryskuos aktivitatis, muzyka, literatura) puorzynuotuoji.
Kasgods Latgalīšu kulturys goda bolvys padūšonys ceremonejā sasateik aktivuokī ļauds, kurūs darbeibys, dzeivis aicynuojuma i rūseišonuos laiks ir latgalīšu kultura voi ar tū saisteituos nūzaris. Kotru godu bolvu padūšonys ceremoneja teik kuplynuota ar latgaliskim muzykalim prīšknasumim voi pārnejuo goda spylgtuokajim izvadumim. 2016. goda 28. februārī ceremonejis pyrmajā daļā byus vareibā ūtrū reizi pīdzeivuot festivalā „ORGANismi” topušū muzykalū izvadumu „Saule. Bērni. Rainis”, kurymā pi vargaņu ir Izcileibys bolvys kultūrā sajiemieja Iveta Apkalna, bet ūtrajā daļā byus svineiga bolvu padūšona, kuru itymā reizē otkon vadeis akters i muzikis Kristaps Rasims. Iz apbolvuošonys ceremoneju kluotīnē ir gaideits kotrys interesents. Beleti nūpārkami Latgolys viestnīceibys GORS i „Biļešu Paradīze” kasēs. Beleta cena 3,00 €.
Latgalīšu kulturys goda bolvys „Boņuks” mierkis ir veicynuot latgalīšu kulturvidis saglobuošonu i atteisteibu, kai ari apkūpuot i gūdynuot spylgtuokūs i nūzeimeiguokūs sasnāgumus latgalīšu kultūrā pārnejuo goda grīzumā. Bolvys aizsuocieji 2008. godā beja bīdreibys „Kukuži” i „Latgolys Producentu Grupa”, bet 2013. godā bolvys organiziešonu puorjieme Latgolys viestnīceiba GORS. 2015. goda bolvai pretendentu dasacejumi teik padūti 19 nominacejis, kas atsatīc iz sabīdryskūs aktivitašu, muzykys i literaturys laukim.
Pārn bolvys par padareitū, sasnāgumim voi aktivitati latgalīšu kulturā 2014. godā sajieme rakstneica Inga Ābele par romanu „Klūgu mūks”, dzīsminīks Kārlis Kazāks, muokslinīks Osvalds Zvejsalnieks, literāte Ilze Sperga, Viestura Kairiša dokumentaluo kina „Pelikāns tuksnesī”, komponists Rihards Dubra, grupys „Bez PVN”, „Dabasu Durobys”, „Laimas Muzykanti”, „Elektrofolk” i cyti, bet bolva par myuža īguļdejumu latgalīšu kulturā tyka pasnāgta žurnālistei Marutai Latkovskai.
Latgalīšu kulturys goda bolvys „Boņuks 2015” nūtikšonu atbolsta Vaļsts kulturkapitala fonds, Kulturys ministreja i Vileks nūvoda dūme.
Tīšsaistē anketys aizpyldomys: http://ej.uz/Bonuks_2015. Saziņai i vaicuojumim: bonuks [at] rezekne.lv
Nūlykums i vaira dazynuošonys: http://latgalesgors.lv/lv/latgaliesu-kulturas-gada-balva-bonuks
