Latgolys viestnīceiba GORS izsludynoj pretendentu pīsasaceišonu Latgalīšu kulturys goda bolvai “Boņuks 2023”. Pretendentu pīsaceišona īspiejama da 12. janvara. Muola statuetis par padareitū 2023. godā sajims latgaliskuos kulturys aktivitatis, nūtikšonys, procesi i personeibys. “Boņuks” vys vēļ ir vīneiguo bolva, kura jau sešpadsmytū reizi turpynoj eipaši izceļt i gūdynuot sasnāgumus i padareitū latgaliskuos kulturys dzeivē. Bolvys padūšonys ceremoneja nūtiks 2. martā kluotīnē Latgolys viestnīceibā GORS i tīšraidē LTV1.
Latgalīšu kulturys goda bolva teik reikuota, kab apkūpuotu lobuokū paguojušajā godā padareitū i nūtykušū, gūdynuotu aktivuokūs Latgolys kulturys puorstuovus, popularizātuojus, veicynuotu jaunradis i kulturys daudzveideibys atteisteibu iz prīšku. Pretendentus bolvai ari itūreiz var īsnēgt kategorejuos “Volūda. Literatura. Publicistika”, “Aktivitatis. Nūtikšonys. Personeibys” i “Audio. Video”, nu kurūs bolvys žureja, izviertejūt pretendentus divejuos kuortuos, izvierzeis 30 nominantus i nu tūs – bolvys sajiemiejus – aktivitatis, personeibys, nūtikšonys, dorbus, bez kurūs vysvaira nabyutu īdūmojama latgaliskuo kultura 2023. godā. Vīna bolva namaineigai tiks pīškierta par myuža īguļdejumu latgalīšu kulturys atteisteibā. Aizpiļdeitys pīsacejuma anketys bolvai “Boņuks 2023” tīšsaistis pīsacejuma, elektroniskā veidā voi pa postu Latgolys viestnīceiba GORS gaideis da 2024. gods 12. janvara. Īsnāgtūs pīsacejumus izviertēs latgaliskū kulturvidi voi attīceigū bolvys nūzari puorzynūša žureja. Bolvys pretendenta pīsacejuma anketu škārsteiklā var atrast: bonuks.lv i latgalesgors.lv.
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnajā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Bolvys “Boņuks 2023” padūšonys ceremoneja paradzāta 2024. gods 2. martā Latgolys viestnīceibā GORS, kai ari tei byus nūsaverama tīšraidē LTV1. “Boņuka 2023” ceremonejis vadeituoji byus bruoli Kozlovski - Oskars, Jurs, Juoņs i Mārteņš aba Kozmens – lobuok zynomi kai humora šova “Četri brāļi” daleibnīki.
Ituo gods suokuos Latgalīšu kulturys goda bolvys “Boņuks 2022” sajēme desmit aktivuokuos, spūdruokuos i plašuokū rezonansi dabuojušuos latgaliskuos kulturys nūtikšonys, personeibys, projekti 2022. godā. Bolvys sajēme bīdreiba “LgSC” par aktivu dorbuošonūs 2022. godā, Daugovpiļs teatra izruode “Spreideits”, grupa “Tautumeitas” ar dzīsmem i videoklipim nu albuma “Skrejceļš”, īstudiejums “Muols”, Ligijis Purinašys dzejis kruojums “pierobežas”, myusu dīnu latgalīšu literaturys raidīroksts “Puslopys”, Nautrānu pogosta karte latgaliski, pyrmais latgalīšu serials “FATI”, Valentins Lukaševičs ar izdavumu “Casnāgu maizeitis” i vuiceibu kurss “Latgaliešu rakstu valoda” platformā “Tava klase”. Par myuža īguļdejumu latgalīšu kulturys atteisteibā tyka gūdynuots fotomuokslinīks, foto viesturnīks, Latgolys fotografu bīdreibys dybynuošonys iniciators i prīšksādātuojs Igors Pličs.
Latgalīšu kulturys goda bolva “Boņuks” pyrmū reizi tyka padūta 2009. godā, bet nu 2013. gods bolvu reikoj Latgolys viestnīceibys GORS komanda, sasadorbojūt ar bīdreibu “Partitūra”.
“Boņuka 2023” nūtikšonu atbolsta Vaļsts kulturkapitala fonda mierkprograma “Latvīšu viesturiskūs zemu atteisteibys programa” i bīdreiba “Latgales reģiona attīstības aģentūra”, kai ari Leivuona nūvoda pošvaļdeiba i Rēzeknis piļsātys dūme.
