Latgolys viestnīceiba GORS aicynoj dasaceit pretendentus kasgadejai latgaliskuos kulturys bolvai “Boņuks”, kas ir vīna nu zynomuokūs i gaideituokūs nūtikšonu Latgolys kulturys dzeivē. Dasacejumi par 2025. godā padareitū teik pījimti da 16. janvara. Muola statuetis tiks pīškiertys latgaliskuos kulturys aktivitatem, nūtikšonom, procesim i personeibom, kas davušys nūzeimeigu īguļdejumu goda laikā. Bolvys padūšonys ceremoneja nūtiks 14. martā 18 stuņdēs kluotīnē Latgolys viestnīceibā GORS, i tū varēs vērtīs ari tīšraidē LTV1, LSM.lv i LR1.
Latgalīšu kulturys goda bolva “Boņuks” pyrmū reizi padūta 2009. godā, bet nu 2013. gods bolvu organizej Latgolys viestnīceibys GORS komanda. Bolvys mierkis ir apkūpuot īprīškejuo goda nūzeimeiguokūs dorbus i nūtikšonys, gūdynuot aktivuokūs Latgolys kulturys procesa puorstuovus i popularizātuojus, kai ari veicynuot jaunradis atteisteibu i kulturys daudzveideibu. Pretendentus bolvai ari itūgod var dasaceit kategorejuos “Volūda. Literatura. Publicistika”, “Aktivitatis. Nūtikšonys. Personeibys” i “Audio. Video”. Izviertejūt dasacejumus divejuos kuortuos, bolvys žureja izvierzeis 30 nominantus i nūsaceis bolvys sajiemiejus – aktivitatis, personeibys, nūtikšonys i dorbus, bez kurūs latgaliskuo kultura 2025. godā nabyutu īdūmojama. Vīna bolva tradicionalai tiks pīškierta par myuža īguļdejumu latgalīšu kulturys atteisteibā. Aizpiļdeitys dasacejuma anketys bolvai “Boņuks 2025” Latgolys viestnīceiba GORS gaideis da 16. janvara – tīšsaistē, elektroniski voi pa postu. Īsnāgtūs dasacejumus izviertēs latgaliskū kulturvidi voi attīceigū bolvys nūzari puorzynūša žureja. Bolvys pretendenta dasacejuma anketu škārsteiklā var atrast: bonuks.lv i latgalesgors.lv.
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnajā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonuos pasuokums. Bolvys “Boņuks 2025” padūšonys ceremoneja nūtiks 14. martā Latgolys viestnīceibā GORS, kai ari tū varēs vērtīs tīšraidē LTV1 i LSM.lv. “Boņuks 2025” ceremonejis vadeituojs byus radejis personeiba i influencers Lauris Zalāns.
Ituo gods suokuos bolvys par padareitū, sasnāgumim voi aktivitati latgalīšu kulturā pārņ sajēme Amandys Anusānis i Liānys Merņakys ceļojūšuo izstuode "Baba, kurū škārsteikla bārni vaira napīdzeivuos", Bronislavys Martuževys fonds “Rakstītāja” i Bronislavys Martuževys symtgadis nūtikšonys – dzīšmu gruomota "Dzimst dziesmas tautā, dzimst..." i koncertizvadums “Topi stipra, sirds”, Daugovpiļs teatra izruode latgaliski "Kaids nūteikti atīs", Evija Maļkeviča-Grundele, muzeja "Ondrupenis lauku sāta" nūvodpietneica, Juoņa Gleizda symtgadei veļteiti pasuokumi – Rēzeknis nūvoda pošvaļdeibys konkurss “Juoņa Gleizda bolva fotografejā” i fotogruomota “Gleizda metode”, Jura Urtāna gruomota "Latgales pilskalni un to folklora", literaruos jaunradis latgaliski veicynuošonys programa, folklorys kūpys "Upīte" projekts - kolhoza laiku dzīšmu atjaunuošona, koncertizvadums "Folk pasija: Francis Trasuns", vinilplate Seimaņs Putāns "Caur bolsim as eju" i koncertizruode "Putāns. Toreiz un tagad.”. Par myuža īguļdejumu latgalīšu kulturys atteisteibā tyka gūdynuota Nautrānu vydsškolys latvīšu volūdys i literaturys školuotuoja Veronika Dundure. 2024. gods simpatejis bolvys “Žyks” sajiemiejs - raidejumu cyklys “Pazudušū pādu retrospekceja - pīrūbeža”.
“Boņuks 2025” nūtikšonu atbolsta Vaļsts kulturkapitala fonda mierkprograma “Latviešu vēsturisko zemju attīstības programma” i bīdreiba “Latgales reģiona attīstības aģentūra”.
Dasaceišona TE
