Nūsasliedzs žurejis dorbs pi Latgalīšu kulturys goda bolvys “Boņuks 2025” pretendentu dasacejumu izviertiešonys, izvierzejūt treisdesmit lobuokūs i spūdruokūs nominantus. Desmit nūzeimeiguokuos 2025. gods nūtikšonys, aktivitatis i cylvāki latgaliskajā kulturā tiks gūdynuoti kasgadejā bolvys padūšonys ceremonejā 14. martā 18.00 stuņdēs, padūdūt ari bolvu par myuža īguļdejumu latgalīšu kulturys atteisteibā. Itūgod bolvys padūšonys ceremoneja nūtiks kai ar skateituoju byušonu kluotyn Latgolys viestnīceibā GORS, tai tū varēs vērtīs tīšraidē LSM.lv, REplay.lv, klauseitīs LR1, kai ari nūsavērt LTV1 21.10 stuņdē.
Itūgod bolvys par aktivitatem, dorbu i sasnāgumim latgaliskajā kulturā tiks padūtys jau ostoņpadsmytū reizi. Latgalīšu kulturys goda bolvys mierkis ir izceļt nūzeimeiguokuos nūtikšonys, spūdruokuos iniciativys i cylvākus pārnajā godā latgaliskajā kulturā, kai ari veicynuot i rūsynuot jaunradis i kulturys daudzveideibys atteisteibu iz prīšku.
Kai pretendentu viertiešonys kritereji ir izvierzeiti kai pretendenta snāguma kvalitate, aktivitate vysa gods laikā, regionā, vaļstī voi plotuokā mārūgā radeituo rezonanse, tai latgaliskums i/voi Latgolys kulturys vierteibu nesšona, pretendenta ilgtspieja – ītekme iz latgaliskuos kulturys procesim iz prīšku. Itūgod tyka īsnāgti 155 pretendentu dasacejumi, kurūs izviertēja žurejis komiseja. Tuos sastuovā dorbojās īprīškejūs godu bolvu sajiemieji, medeju puorstuovi, bolvys reikuotuoju puorstuovi, latgaliskuos kulturys sabīdryskī aktivisti i attīceigūs sferu daaicynuotī eksperti, kurūs kasdīna nav saisteita ar latgaliskū kulturu.
Latgalīšu kulturys goda bolvys “Boņuks 2025” nominanti ir (alfabeta parādā):
1. Anna Putāne – latgalīšu folklorys puorraksteituoja
2. Daugovpiļs teatra īstudiejumi latgaliski “Hekube” i “Plykspuorneiša puorsacenis”
3. Diāna Zirniņa – ilggadejuo Latgolys viestnīceibys GORS vaļdis lūcekle
4. Dokumentaluo kina “Ērģeles naktī. Iveta Apkalna”
5. Edeite Laime – latgalīšu kulturys i literaturys kūpieja
6. Festivals “Muzykys Skrytuļs” Leiksnā
7. Folklorys kūpys “Grodi” albums “Sudrabu smeldama”
8. Grupys “Bruoli i Muosys” albums “Na pādejais”
9. Grupys “Laimas Muzykanti” zalta dzīšmu izlase i 30 godu jubileja
10. Grupys “Varang Nord” albums “Mygla”
11. Prāvests Guntars Skutels
12. Juna Fosis lugys “Kaids nūteikti atīs” izdavums Jūlijis Tumanovskys tulkuojumā
13. Daugovpiļs teatra aktrise Kristīne Veinšteina
14. Latgalīšu kulturys kusteibys “Volūda” 20 godu jubileja
15. Latgalīšu volūdys video stuņde “Lels, lels okeans”
16. Latgolys Dzīšmu svātki Daugovpilī
17. Latvejis Radejā īskaņuotys 15 latgalīšu klausompuosokys
18. Latvejis Televizejis raidejums “Neatklātā Latgale”
19. Ligijis Purinašys dzejprozys kruojums “Magnificat”
20. “LSM Bērnistaba” latgaliski
21. Muzykys albums “Daugavas Rāgas”
22. Nautrānu kulturtelpa
23. “Nezināmā Rēzekne” i tuos organizātī pasuokumi
24. Pyrmuo Latgolys tautystārpu skate
25. Rodūšūs rezidenču programa latgalīšu literaturā, volūdnīceibā i Latgolys pietnīceibā
26. Raidīroksts “Es izvēlos dzīvi laukos”
27. Rēzeknis suokumškolys zānu koram zalta diploms Dzīšmu svātku koru konkursā
28. Romana “Myura kolns” radejis īstudiejums
29. Sarmītis Trūpys debejis gruomota “Melnais stārķis”
30. Vladislava Malahovska monografeja “Mēs un viņi: latgalieši, baltieši un cittautieši starpkaru Latvijā. Latgaliešu lietas”
Bolvys “Par myuža īguļdejumu latgalīšu kulturys atteisteibā“ sajiemiejs tiks publiski paziņuots februara vydā.
Latgalīšu kulturys goda bolvu “Boņuks 2025” vadeis radejis personeiba i influencers Lauris Zalāns i Medņovys tautys noma etnografiskais ansamblis “Medņeva”. Skateituojus prīcynuos Bolvu Muzykys školys bārnu kors (dirigente Linda Vītuola), Sovvaļnīks, folklorys kūpa “Grodi”, folkroka grupa “Laimas Muzykanti”, Dana Vasiļjeva i Mārcis Lipskis, grupa “JUUK”.
Ituo gods ceremonejis temys īdviesme guojuse nu muokslineicys i teatra režisoris Marikys Čerņavskys saceituo: “Vaļsti voi tautu mes varim izatāluot kai tautystārpu, kur nūmalis i attuoluokī regioni ir tārpa molu rūtuojumi. Mes Latgolā asam itei tautystārpa mola, i tai ir juobyut dubultai, tai juobyut izrūtuotai, kam mola vysuvīgļuok pleist, i reizē taišni izrūtuotuo mola ir tei, piec kurys atpazeisim tautu."
“Boņuks 2025” atbolsta Vaļsts kulturkapitala fonds, Vaļsts kulturkapitala fonda mierkprograma “Latvīšu viesturyskūs zemu atteisteibys programa” i bīdreiba “Latgales reģiona attīstības aģentūra”. Par informativū atbolstu pasasokom Latvejis Televizejai, Latgalīšu kulturys ziņu portalam lakuga.lv, Latvejis Radejis Latgolys studejai i Latvejis Sabīdryskuo medeja portalam LSM.lv.
