2020. goda 23. februarī Rēzeknē, Latgolys viestnīceibā GORS, nūtiks kasgadejuo Latgalīšu kulturys goda bolvys “Boņuks” padūšonys ceremoneja, kas ir ari vīna nu gaideituokūs latgalīšu kulturys aktivistu i interesentu sasatikšonys reižu. Leidz 6. janvaram GORS aicynoj dasaceit bolvys “Boņuks 2019” pretendentus. Muola statuetis sajims 11 latgaliskuos kulturys aktivitatis, nūtikšonys, procesi i personeibys. “Boņuks” ir vīneiguo bolva, kura eipaši izceļ i gūdynoj sasnāgumus i padareitū latgaliskuos kulturys dzeivē.
Latgalīšu kulturys goda bolvys “Boņuks” mierkis ir veicynuot latgalīšu kulturvidis saglobuošonu i atteisteibu, kai ari apkūpuot i gūdynuot spylgtuokūs i nūzeimeiguokūs sasnāgumus latgalīšu kulturā pārnejuo goda grīzumā. Pretendentus bolvai var īsnēgt kategorejuos “Volūda. Literatura. Publicistika”, “Aktivitatis, Nūtikšonys. Personeibys” i “Audio. Video”, nu kuru bolvys žureja, piečuok izviertejūt pretendentus nakluotīnis i kluotīnis kuortuos, izvierzeis 30 nominantus i nu tūs 10 bolvys sajiemiejus – aktivitatis, personeibys, nūtikšonys, dorbus, bez kuru vysa vaira nabyutu īsadūmojama latgaliskuo kultura 2019. godā. Vīna bolva namaineigi tiks daškierta par myuža īguļdejumu latgalīšu kulturys atteisteibā. Sovu skaiteituoju simpateju bolvu padūs ari “Latgalīšu kulturys ziņu portals lakuga.lv”. Aizpiļdeitys dasacejuma anketys bolvai “Boņuks 2019” elektroniskā formatā, pa postu ci tīšsaistis dasacejuma veidā Latgolys viestnīceiba GORS gaideis leidz 2020. goda 6. janvaram. Dasacejumus bolvai izvērtēs latgaliskū kulturvidi ci attīceigū bolvys lauku puorzynūša žureja vysmoz 25 ļaužu sastuovā. Bolvys pretendentu dasacejuma anketu škārsteiklā var atrast: http://bonuks.lv i http://latgalesgors.lv.
Kas gods Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnejā godā padareitū, nu ari latgalīšu kulturā aktivūs ļaužu, interesentu i atbaļsteituoju sasatikšona. “Boņuks 2019” padūšonys ceremoneja nūtiks 2020. goda 23. februarī, tuos vadeišona itymā reizē byus “Ghetto Games” personeibys aba vīnkuoršuo latgalīša Laura Zalāna i uorsta i jaunuo hip-hop muokslinīka Būrs (Armanda Buļa) rūkuos. Ceremonejā uzastuos postfolklorys grupa “Rikši”, grupa “Bez PVN”, Rēzeknis pyušomū instrumentu orkestris i veiru kors “Graidi” ar gabalenim nu izvaduma “Dzeivis graidi”, folklorys kūpa “Upīte”, muzike Dana Vasiļjeva, folklorys kūpa “Ilža” i cyti muokslinīki, kuru vuordi tiks nūsaukti, kod ceremoneja īs tyvuok.
Pyrma “Boņuks 2019” ceremonejis kotrys grybātuojs ir aicynuots iz Latgolā (Ludzā) dzymušuo, bet garus godus trymdā dzeivuojušuo gleznuotuoja, grafiķa i muokslys zynuotnīka Jura Soikāna (1920–1995) symtgadei veļteituos izstuodis atkluošonu. Muokslinīka dorbu motivi byus īveiti ari bolvys padūšonys ceremonejis scenografejā.
Ituo goda suokuos Latgalīšu kulturys goda bolvys “Boņuks 2018” sajieme desmit aktivuokuos, spylgtuokuos i plotuokū rezonansi dabuojušuos latgaliskuos kulturys nūtikšonys, personeibys i projekti 2018. godā. Bolvys sajieme dzejneica Anna Rancāne par kruojumu “Prīca i klusiešona”, dokumentaluo kina “Latgalīši Pīterpilī”, Aija Īzāka i “Teksasys latgalīši” par albumu “Dvieselis steigys”, grupa “Bez PVN”, apvīneiba “Latgalīšu Reps”, tekstilmuokslineicys Annelis Slišānis projekts #100dečiLatvijai, raidejums “Dzirdi balsis ar Kārli Kazāku” par Ludzys izlūksni, dzejnīka i sabīdryskuo darbinīka Ontona Slišāna 70 godu svieteišona Zīmeļlatgolā, dzīšmu gruomota i CD bārnim “Zalta puče”, kai ari komiķa Juoņa Skuteļa i “Benji Knewman” īdzeivynuotais koncepts “Nameiz”. Par myuža īguļdejumu latgalīšu kulturys atteisteibā tyka gūdynuots muokslinīks Osvalds Zvejsaļnīks.
Latgalīšu kulturys goda bolva “Boņuks” pyrmū reizi tyka padūta 2009. godā, bet nu 2013. goda bolvu organizej Latgolys viestnīceibys GORS komanda. “Boņuks 2019” nūtikšonu atbolsta Vaļsts kulturkapitala fonda Latgolys kulturys programa ar A/S “Latvijas valsts meži” i Latgolys regiona atteisteibys agenturys atbolstu, kai ari Rēzeknis piļsātys dūme. Bolvu padūšonys ceremonejā 23. februarī Latgolys viestnīceibys GORS Lelajā zālē kluotyn byut var kotrys grybātuojs. Beleti nūpārkami GORS i “Biļešu Paradīze” beletu sistemuos. Beletu cena 10,00 €, GORS Kulturys viestnīku programys daleibnīkim beletim 10 % atlaide.
