Itūgod Latgalīšu kulturys goda bolvys "Boņuks 2024" ceremonejā par myuža īguļdejumu latgalīšu kulturys atteisteibā tiks gūdynuota latvīšu volūdys i literaturys školuotuoja, Latgalīšu volūdys, literaturys i kulturviesturis školuotuoju asociacejis vadeituoja Veronika Dundure. Bolvys padūšonys ceremoneja nūtiks 1. martā 18.00 stuņdēs Latgolys viestnīceibā GORS kluotīnē i tīšraidē lsm.lv 18.00 stuņdēs i LTV1 21.10.
Veronika Dundure ir Nautrānu vydsškolys latvīšu volūdys i literaturys školuotuoja i nu 2001. gods – Latgalīšu volūdys, literaturys i kulturviesturis asociacejis vadeituoja. Dzymuse i auguse Kuorsovā, kur ari pabeiguse vydsškolu. Piec vydsškolys absolviešonys davusēs iz Reigu, kur studējuse Latvejis Universitatis Filologejis fakultatē. Veronikai latgalīšu volūda ir tyva jau nu bierneibys, kam jei ir auguse latgaliski runojūšā saimē.
Latgalīšu volūdai i literaturai Veronika Dundure vaira pīsavārsuse paguojušuo godu symta 80. godūs. Pasasokūt juos dorbam, jau vaira nakai 20 godu teik organizāts skotivis runys konkurss “Vuolydzāni” i latgalīšu rokstu volūdys i kulturviesturis olimpiade, kurai nu 2013. gods ir vaļsts atkluotuos olimpiadis statuss. Latgalīšu volūdys, literaturys i kulturviesturis asociaceja regulari organizej konferencis, seminarus, skaidroj institucejom par vajadzeibu vuiceit latgalīšu volūdu školuos. Pasasokūt Veronikys i asociacejis naatlaideigajam dorbam, itūšaļt školuos latgalīšu rokstu volūdu ir vareiba vuiceitīs 1.-9. klasē, kai ari specializātū kursu – vydsškolys klasēs, izmontuot vuiceibu materialus “Olūteņš”, kas ir pyrmais dorbs kompleksai latgalīšu rokstu volūdys i nūvodpietnīceibys apgivei. Nu 2003. gods Nautrānūs dorbojās Latgalīšu volūdys i kulturviesturis metodiskais centrys, kurā Veronika aktivai dorbojās kotru dīnu. Veronika Dundure ir školuotuoju vosorys kursu “Vosoruošona” iniciatore, kas guodoj par školuotuoju izaugsmi, reikoj regularys latgalīšu volūdys školuotuoju apvuiceibys. Jei ir ari Vaļsts volūdys centra Latvīšu volūdys ekspertu komisejis latgalīšu rokstu volūdys apakškomisejis lūcekle. Dorbs komisejā, taipat kai vysys cytys aktivitatis, ir Veronikys Dunduris breivpruoteigais dorbs.
Veronikys Dunduris myuža īguļdejums i sirdsdorbs Latvejā ir sajiems atzineibu. Jei ir apbolvuota ar vairuokom prestižom bolvom i atzineibom, tymā skaitā 2003. godā – ar Pateiceibys rokstu nu Latvejis Vaļsts prezidentis Vairys Vīkis-Freibergys par gūdpruoteigai i talanteigai padareitu dorbu i prācu latvīšu volūdys vuiceišonā, 2020. godā Vaļsts prezidents i Ordiņu kapituls Veroniku Dunduri ir īcieļs par Atzineibys krysta komanderi, 2022. godā ir sajimts Atzineibys roksts nu Latvejis Republikys Ministru kabineta par nūzeimeigu īguļdejumu latgalīšu volūdys i kulturys populariziešonā.
Da šam Latgalīšu kulturys goda bolvā “Boņuks” par myuža īguļdejumu latgalīšu kulturys atteisteibā gūdynuoti gruomotu izdeviejs Juoņs Elksnis, dzejnīks i literaturzynuotnīks Osvalds Kravalis, sabīdryskais darbinīks, Latgalīšu rakstnīceibys muzeja vadeituojs Pīters Luocis, dzejnīks, folklorists i sabīdryskais darbinīks Ontons Slišāns, radejis raidejuma “Latgolys vuords“ veiduotuojs Bronislavs Spridzāns, etnografiskuo ansambļa “Rikova“ ilggadejuo vadeituoja Janīna Mičule, Atašīnis etnografiskuo ansambļa “Vīraksne“ vadeituoja Valentīna Mičule, kordirigente Terēze Broka, žurnaliste, žurnala “Katōļu Dzeive“ redaktore Maruta Latkovska, katuoļu pravests, kulturviesturnīks i sabīdryskais darbinīks Alberts Budže, kordirigenti i pedagogi Antonina i Vitolds Milaševiči, školuotuojs, publicists i literats Alberts Spuogis, volūdneica Lideja Leikuma, muokslinīks Osvalds Zvejsalnieks, tieļnīks Indulis Folkmanis i keramiks Voldemārs Voguls, kordirigents Juoņs Gruduls, fotomuokslinīks Igors Pličs i Kruoslovys ilggadejais kulturys darbinīks Jezups Dobkevičs.
Latgalīšu kulturys goda bolva “Boņuks” pyrmū reizi tyka padūta 2009. godā, bet nu 2013. gods bolvu reikoj Latgolys viestnīceibys GORS komanda. “Boņuku 2024” atbolsta Vaļsts kulturkapitala fonda mierkprograma “Latvīšu viesturyskūs zemu atteisteibys programa” i bīdreiba “Latgales reģiona attīstības aģentūra”, z/s “Kotiņi” i Rekovas Dzirnavas, kai ari Leivuona, Ludzys, Preiļu, Kruoslovys, Bolvu, Rēzeknis nūvoda pošvaļdeibys i Rēzeknis vaļstspiļsātys pošvaļdeiba. Par informativū atbolstu pasasokom Latvejis Televizejai, Latgalīšu kulturys ziņu portalam lakuga.lv, Latvejis Radejis Latgolys studejai i Latvejis Sabīdryskuo medeja portalam LSM.lv.
