2025. gods 1. martā jau septeņpadsmytū reizi tiks padūtys Latgalīšu kulturys goda bolvys “Boņuks”. Da 13. janvara Latgolys viestnīceiba GORS izsludynoj pretendentu dasaceišonu. Muola statuetis par padareitū 2024. godā sajims latgaliskuos kulturys aktivitatis, nūtikšonys, procesi i personeibys. “Boņuks” vys vēļ ir vīneiguo bolva, kura turpynoj eipaši izceļt i gūdynuot sasnāgumus i padareitū latgaliskuos kulturys dzeivē. Bolvys padūšonys ceremoneja nūtiks 1. martā 18.00 stuņdēs kluotīnē Latgolys viestnīceibā GORS i tīšraidē LTV1 i LSM.lv.
Latgalīšu kulturys goda bolva “Boņuks” pyrmū reizi padūta 2009. godā, bet nu 2013. gods bolvu organizej Latgolys viestnīceibys GORS komanda. Tei teik reikuota, kab apkūpuotu lobuokūs paguojušuo goda dorbus i pasuokumus, gūdynuotu aktivuokūs Latgolys kulturys puorstuovus, popularizātuojus, veicynojūt jaunradis i kulturys daudzveideibys atteisteibu iz prīšku. Pretendentus bolvai ari itūreiz var īsnēgt kategorejuos “Volūda. Literatura. Publicistika”, “Aktivitatis. Nūtikšonys. Personeibys” i “Audio. Video”, nu kurūs bolvys žureja, izviertejūt pretendentus divejuos kuortuos, izvierzeis 30 nominantus i nu tūs – bolvys sajiemiejus – aktivitatis, personeibys, nūtikšonys, dorbus, bez kurūs vysvaira nabyutu īdūmojama latgaliskuo kultura 2024. godā. Vīna bolva namaineigai tiks pīškierta par myuža īguļdejumu latgalīšu kulturys atteisteibā. Aizpiļdeitys dasacejuma anketys bolvai “Boņuks 2024” tīšsaistis dasacejuma, elektroniskā veidā voi pa postu Latgolys viestnīceiba GORS gaideis da 2025. gods 13. janvara. Īsnāgtūs dasacejumus izviertēs latgaliskū kulturvidi voi attīceigū bolvys nūzari puorzynūša žureja. Bolvys pretendenta dasacejuma anketu škārsteiklā var atrast: bonuks.lv i latgalesgors.lv.
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz īprīškejā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Bolvys “Boņuks 2024” padūšonys ceremoneja paradzāta 2025. gods 1. martā Latgolys viestnīceibā GORS, kai ari tū varēs vērtīs tīšraidē LTV1 i LSM.lv. “Boņuka 2024” ceremonejis vadeituoji byus Jaunuo Reigys teatra akters Andris Keišs i Rēzeknis Tautys teatra akters Juoņs Pampe.
Ituo gods suokuos bolvys par padareitū, sasnāgumim voi aktivitati latgalīšu kulturā pārņ sajēme dzīšmuspēle “Trasuns. Fabulas”, folklorys kūpa “Ceidari” ar albumu “Dzīduotumi, ļustātumi”, golda spēle latgaliski “Čipierkstneits”, grupys "Bez PVN" albums "Paraleli horizonti" i tuo prezentacejis koncerti, Inta Pujāta vidis objekti “Oduma meitys”, komikss bārnim latgaliski “Sunāns breiveibā”, Latgolys karūga apstyprynuošona, projekts “Bolsu tolka”, radejis īstudiejums “Bruoli”, veiru kors “Graidi”. Par myuža īguļdejumu latgalīšu kulturys atteisteibā gūdynuots Kruoslovys kulturys styprais bolsts, ilggadejs kulturys darbinīks, aktivs Kruoslovys Romys katuoļu draudzis i Kruoslovys pūļu bīdreibys dzeivis organizators Jezups Dobkevičs. 2023. gods simpatejis bolvys – “Žyks” – sajiemiejs beja Baļtinovys teatris “Palādas”.
“Boņuka 2024” nūtikšonu atbolsta Vaļsts kulturkapitala fonda mierkprograma “Latvīšu viesturyskūs zemu atteisteibys programa” i bīdreiba “Latgolys regiona atteisteibys agentura” i Rēzeknis piļsātys dūme.
