Arhitektura

Rēzekne ir pyrmais mīsts Latvejā, kur nu pošu pamatu izcalts piļneigi jauns koncertzals, i niu tys izskotams par svareiguokū kultutys byuvi vysā Latvejā. Arhitekturys projektu konkursā 2008. godā uzvarieja Ulda Bolūža i Daigys Bikšis dorbs ar devizi “Zeidaste”.

Latgolys viestnīceiba GORS ir klasiskys treisdaleiga apjūma salykums – skotam atdareits vestibils vairuoku leimiņu augstumā, lelais zals, kam tics “Gors” nūsaukums, i mozais zals zam nūsaukuma “Zeidaste”. Stykluotuos fasadis i dekorativa škīdrcementa plātnem apdarynuotuos fasadis labi radzamys i piļsātys skotu punktim i harmoniski īsakļaun vītys reljefā. Vizuali nūuordeits rūbežs storp fasadi i jumtu, sātys nūslādzūšajā daļa izmontojūt tūs pošus materialus i proporceju dalejumu, pi tuo jumta terase vosorys sezonā ir atdareita kotram, i ite var taiseit kinu vokorus i koncertus. Apleik tresdaleiga apjūma magejai ir viertine ustobu mieginuojumim, izstuodem, seminarim, kai ari atseviškys ustobys muokslinīkim, dirigentim. Plašī styklojumi izsvar GORS sabīdryskū raksturu i roda īšktelpys saisteibu ar uoru. Naktim izgaismuotuos sorkoneigūs i oranžūs tūņu sīnys caur styklojumu daboj sirreali kusteigu efektu – ruodīs, ka vysa dātu vibrej nadzieržamu muzykys skonu ītekmē. GORS sātys tāls ir dzeivisprīceigu kontrastu pīpiļdeits – gaišais pret tymsu, kruosainais pret malnboltū, atdareitais pret nūslāgtū, eksponātuo betona estetika pret kūka syltumu, sātys plana sarežgeiteiba pret seņ zynomū septeņu pamattūņu do re mi fa sol la si parādu. Ar itim pamattūnim apzeimētys daudzejuos sātys kuopņu telpys, tai paleidzūt orientētīs sātā. Sūpluok sātai asūšuo iudiņa viersa spielej nabeidzamu myrguojumu koncertu gon dzīsnys stuņdēs, gon vokora režisātajā gunī.

Sūpluok Latgolys viestnīceibys GORS lobīkuortuota ari apleicejuo teritoreja aptyvai 3,5 hektaru lelumā. Centra apleicīnē sataiseita guojieju ūļneica, brukavuoti celeni i mašynu stuovvīta 170 mašinem, pi upis sataiseitys terasis veida trepis, pastateitys stryuklakys i sūleni, sataiseiti apstuodejumi i padareiti apzaļumuošonys dorbi. Sātai nav pogroba stuova, pats zamuokais sātys leimiņs ir orkestra bedrei i liftim. Jaunbyuvei leluo zala daļā kūpā ir seši stuovi, nu mozuo zala daļā pīci stuovi. Kūpejuo sātys plateiba ir 11 166 kvadratmetru.

Uldis Bolūds (Uldis  Balodis), arhitekts: “GORS tālā asam atspīgeļuojuši sajiutys par latgalīšim rakstureigū muokslinīcyskū dobu i praktiskū pīeju – tei ir kai ceplis, kura gunī izapauž radūšais gors, līsmis, kas dasaista i sasiļdej celinīku zīmys naktī, tei ir vīta, kurymā pīdzeivuot lelu, mozu, sirsneigu, īdvasmojūšu i vysod eistynu muokslu.”